Jab Sar E Abbas Zainab Ko Mila

Sar Se Ye Karne Lagi Rokar Gila

Aa Gai Baali Sakina Ko Qaza

Ab To Aye Abbas Aankhein Khol Do

Qaidkhane Mein Ye Zainab Ne Kaha

Ab To Aye Abbas Aankhein Khol Do

Dafn Hum Ne Kar Diya Ghamkhaar Ko

Tum Na Aaye Aakhri Deedaar Ko

Ho Gai Hum Se Sakina Bhi Juda

Dard Aur Gham Ka Dafeena Dekh Lo

Ek Nazar Qabr E Sakina Dekh Lo

Ho Nahi Paai Wo Mar Kar Bhi Riha

Ho Gai Hai Dafn Wo Zer E Zami

Aaj Bhi Uske Liye Pani Nahi

Qaidkhana Ban Gaya Hai Karbala

Rote Rote Khatm Saansein Ho Gai,n

Khud Bhi Uski Band Aankhein Ho Gai,n

Jo Tumhe Deti Thi Ro Ro Kar Sada

Mustaqil Sehti Rahi Ranj O Mahan

Saal Bhar Pehne Rahi Ek Pairahan

Ho Gai Ghurbat Ki Us Par Inteha

Ab Sakina Pani Maangegi Nahi

Mashk Bhi Apni Tumhe Degi Nahi

Na Karegi Tum Se Wo Koi Gila

Dukhtar E Shaahe Madeena Ke Liye

Fateha Padh Do Sakina Ke Liye

Kar Do Apna Farz Tum Ye Bhi Ada

Jaan Se Piyari Sakina Thi Tumhe

De Rahi Hoon Main Qasam Uski Tumhe

Khol Do Ek Baar Tum Aankhein Zara

Aamir O Yaqoob Gham Barpa Hua

Zainab E Dilgeer Ne Jab Ye Kaha

Mil Gai Mujh Ko Sakina Ki Rida

Ab To Aye Abbas Aankhein Khol Do